Тыдзень таму намеснікам старшыні райвыканкама І. Ф. Сыроўчанкай падпісаны пратакол даручэнняў па падрыхтоўцы мерапрыемстваў да фестывалю Васіля Цяпінскага. А гэта значыць, што дадзены старт вялікай, цікавай і пачэснай працы па ўшанаванні нашага славутага земляка, асветніка і гуманіста, які пакінуў яркі след у гісторыі не толькі нашага краю, але і ўсёй Беларусі.
Згодна з даручэннямі падрыхтоўка будзе весціся і ўжо вядзецца па розных накірунках.
Сродкі масавай інфармацыі раскажуць пра жыццёвы і творчы шлях пісьменніка, яго ўклад у развіццё беларускага пісьменства.
Конкурсы па стварэнні герба роду Цяпінскага, самадзейных чытальнікаў і паэтаў «100 радкоў любові да малой радзімы», распрацоўка і выраб генеалагічнага дрэва роду асветніка — не станем пералічваць усе мерапрыемствы, якія мяркуецца прадставіць падчас фестывалю, іх нямала. Аб гэтым мы будзем расказваць чытачам па меры іх падрыхтоўкі, зразумела, не раскрываючы ўсіх сакрэтаў.
Пэўныя намаганні трэба будзе прыкласці дзеля таго, каб прывесці ў належны стан сельскі клуб у Цяпіне, добраўпарадкаваць яго тэрыторыю. Тычыцца гэта і другіх аб’ектаў у вёсцы.
Нельга забывацца і пра крынічку Васіля Цяпінскага, якая месціцца ля дарогі Орша — Лепель. Тут плануецца зрабіць пешаходную дарожку, каб зручна было да яе падысці.
Ды і ўладальнікам уласных падворкаў да свята, а пройдзе яно 22 мая 2021 года, неабходна паклапаціцца пра добраўпарадкаванне сваіх сяліб.
Ну а заўтра ужо адбудзецца пасяджэнне арганізацыйнага камітэта па падрыхтоўцы да фестывалю Васіля Цяпінскага.
