У мінулую пятніцу паўвостраў у вёсцы Белая Царква на некаторы час стаў творчай пляцоўкай для мастакоў, музык, танцораў, спевакоў, народных майстроў. Ля муроў Свята-Троіцкай царквы адбылося раённае свята народных рамёстваў.
Мерапрыемства пачалося з набажэнства, якое правялі свяшчэннаслужыцелі Храма Праабражэння Гасподняга г. Чашнікі і Храма свяціцеля Мікалая, архіепіскапа Мірлікійскага г. Новалукомля, на якім, акрамя творчых асоб і шматлікіх гасцей, што прыехалі на фестываль, прысутнічалі старшыня Чашніцкага райвыканкама Леанід Пляшко, другія кіраўнікі раёна, Новалукомльскага гарвыканкама, старшыні сельвыканкамаў, кіраўнікі устаноў, прадпрыемстваў і арганізацый Чашніччыны.
Затым пачаўся канцэрт духоўнай музыкі і паэзіі. Усе неабходнае, каб далучыцца да акцыі «Запалі свечку», можна было набыць на выставе-продажы царкоўных рэчаў.
На паўвостраве вакол Свята-Троіцкай царквы падчас open air адбыліся спаборніцтвы па пляжным валейболе, дартсе, футболе, гіравым спорце. Прайшоў пленэр сярод мастакоў, вядомых у нашым раёне, а таксама пачаткоўцаў.
На шматлікіх пляцоўках паўвострава напрацягу свята ладзіліся майстар-класы і гульні для дзяцей і дарослых, былі арганізаваны фотазоны, выставы-продажы. Увесь гэты казачны гарадок для гасцей фэсту стварылі калектывы ўстаноў адукацыі Чашнік і Новалукомля, бібліятэк раёна, Тэрытарыяльнага цэнтра сацыяльнага абслугоўвання насельніцтва, раённага цэнтра дзяцей і моладзі, гістарычнага музея, а таксама актывісты РК ГА «БРСМ», аддзела па надзвычайных сітуацыях.
Побач можна было купіць унікальныя сувеніры, даматканае адзенне, упрыгожванні і аксесуары, зробленыя майстрамі Чашніцкага Дома рамёстваў, з Іванска, Новалукомля. У Белаю Царкву таксама завіталі рамеснікі і з Оршы.
На цэнтральнай сцэне ля возера выступілі творчыя калектывы ўстаноў культуры Чашніччыны. У першым аддзяленні амаль пяцігадзіннага канцэрта можна было паслухаць народныя песні, убачыць унікальныя старадаўнія абрады і нават прыняць удзел у іх. На заходзе сонца пачалося эстраднае аддзяленнне.
Гледачы да позняга вечара не толькі падпявалі выступаючым, але і з задавальненнем танцавалі пад сучасныя рытмы. Добры настрой прысутным падаравалі калектывы Лукомльскага, Чарэйскага, Кругліцкага сельскіх дамоў культуры, Іванскага Дома фальклору, Чашніцкага гарадского Дома культуры, Новалукомльскага Палаца культуры, Новалукомльскай і Чашніцкай ДШМ.
На асобнай сцэне, пабудаванай пад раскідзістымі дрэвамі, школы мастацтваў правялі праграму для прыхільнікаў класічнай музыкі.
Былі арганізаваны фудкорты, працавалі атракцыёны. Усяго на мерапрыемстве пабывалі каля 2000 чалавек.
Варвара ЮРКЕВІЧ.
